Kaling ako Kabataan! (Tulang Bantoanon)

Ak narurumruman tung panahot kabataan.

Mga karanasang indi ak malimtan.

Indi mamalayan paglipas it mga oras.

Palibhasa'y pusit pa, uya ra gi aalala.

Sa bawat adlaw nak nalipas ra it kato.

Uya't asa isip kundi buhay nak maado.

Sa pagsuyor sa iskuyla, kada adlaw pursigido.

Makabaoy ra it marka, higit pa sa pumasa.

Pangidamo ay partey ra it ling ato kabataan.

Tuna aga hanggang gab-iy, hagto ngani sa yakaran.

Pikpiriko, alabaduhan basta mahadag ka buyan.

meski udo sa kanidogan, gamit sa laguslusan.

Sa pagtawog sa madabas, meski sa puno it santol.

Pagkatuling ingbubuhat uyang gador yawhak.

Meski sa ugbos it sanga, nabitin, naparadaw pa.

Pag pilhig ay perting bunga sa sakop it kamiseta.

Kag pagrakop it bila bila ruto sa kalikutan.

Usang bagay nak indi rang gadoir nako malimtan.

Pati ruli ruli sa mga punot abokado.

Uya ligtas sa pilit it yangka, gamit namo sa pagrakop.

Pagpanihi ag pagyukyok ruto sa tangkuyan.

Kasusadya'y raw pag nakarakop it maisot nak tambilawan.

Palata ag kukambing, nababaoy saa bunitan.

Pag uya rang gador, meski liswi ay paitan amo inapatulan.

Pagpatukar ra sa bundok ag pagnunot sa ak tatay.

Naranasan nako tanan, paglilik, paggahit, pagrukay.

Pagtanum it paninamum payay, mais, kamote man.

Meski niong makakaon, sagana sa kaumahan.

Tung panahong kato, pagkasimple ra ka buhay.

Makakaon it baghuan, maadoy sa pakiramdam.

Makaani it mais ag payay, payra kami pagkayaman.

Tabungos it payay sa ang sala'y nag-aapaw.

Usa pang indi ra ak malimtan limtan.

Kag paghugot ra it kape roto sa Balinggawan.

Perting pilay, kahapo ra sa pagtukar sa kabundukan.

Tanan kaliy bale waya, sanayiy ra ling kayawasan.

Pag-iskuylay usang bagay nak ak ingpagpursigihan.

Uyag sugut nak uya honor, tuna pa ngani it tung grade one.

Sa lampara'y ag-aaray, assignment ay inghuhuman.

Dahil gusto ra nakong akoy perming masabitan.

Ak nag pangarap ra it magandang buhay.

Sa ak sarili, sa mga hali ag sa tatay ag nanay.

Simpleng buhay naK maado, aber buko pagkayaman.

Basta uya problema, uya gulo sa isipan.

Mga bagay nak natun-an roto sa pag-iskuyla.

Ay ingbutang sa ak isip, ing gamit ra sa maganda.

Sa kahirapan it buhay, napasil-ip kag pag-asa.

Nag-aray it mahinusay, adong buhay ay gumanda.

Ngasing ay tama yang ka buhay nak ak nasuyuran.

Usang maestrang nagtuturo sa kaapasan.

Siling ninra ay mahirap ka buhay it pobreng madam.

Para sa ako kaliy usang trabahong dapat tularan.

Kada adlaw nak lumipas sa buhay it usang maestra.

Ay maadong buhay sa estudyante nida.

Ing mamahal, ing tutuyar kag ida mga obra.

Kada usa rang bayani ka muyat sa inra.

Kaling tulang kali ay halin sa taguipusuon.

Ag handog ra nako sa mga Bantoanon.

Hinaboy sa isip, kabataan ay ing rumrom.

Ginamit nak bisaya ay kag Asi it Bantuon.